Në UEJL u mbajt Panairi i Karrierës 2026 – një urë lidhëse mes studentëve dhe tregut të punës

Panairin e shpalli të hapur Rektori i UEJL-së, Prof. Dr. Sadudin Ibraimi, i cili u uroi mirëseardhje përfaqësuesve të bizneseve pjesëmarrëse dhe theksoi rëndësinë strategjike të këtij aktiviteti për studentët dhe për vetë Universitetin.

“Ky Panair tejkalon dimensionin e një aktiviteti prezantues. Ai përfaqëson një platformë të rëndësishme komunikimi ndërmjet Universitetit dhe tregut të punës, ku potenciali i studentëve lidhet drejtpërdrejt me mundësitë reale për zhvillim profesional. Në vitin kur shënojmë 25-vjetorin e themelimit të Universitetit, kjo ngjarje merr një domethënie të veçantë, si dëshmi e angazhimit tonë të vazhdueshëm për të ndërtuar ura mes dijes dhe praktikës”, theksoi Rektori Ibraimi.

Udhëheqësja e Qendrës së Karrierës, Lumturije Memedi Sinani, shprehu mirënjohje për kompanitë pjesëmarrëse, duke vlerësuar bashkëpunimin e tyre të vazhdueshëm me Universitetin dhe kontributin në krijimin e mundësive për studentët.

Gjatë panairit, studentët patën mundësinë të ndjekin prezantime nga kompani të ndryshme, të realizojnë vizita në stendat e tyre, si dhe të krijojnë kontakte të drejtpërdrejta me punëdhënës potencialë. Një moment i veçantë ishte edhe sesioni informues për studentët me temë “Cracking the Job Market”, i realizuar në bashkëpunim me aleancën ChallengeEU, ku prezantues ishin përfaqësues të kompanive EVN, Coordea, ASK dhe M-House, ku u trajtuan këshilla praktike për hyrjen në tregun e punës.

Në përmbyllje të aktivitetit për të gjitha kompanitë pjesëmarrëse u ndanë certifikata mirënjohjeje për kontributin dhe mbështetjen e tyre të vazhdueshme në fuqizimin e gjeneratave të reja të profesionistëve.

Panairi i Karrierës në UEJL vazhdon të mbetet një platformë e rëndësishme që promovon bashkëpunimin ndërmjet akademisë dhe industrisë, duke kontribuar në përgatitjen e studentëve për sfidat e tregut bashkëkohor të punës.