Delegacioni i Universitetit Mid Sweden viziton UEJL-në: Diskutohen programe të përbashkëta studimi dhe mundësi të reja mobiliteti

Gjatë vizitës, delegacioni suedez zhvilloi një sërë takimesh me përfaqësues të UEJL-së, ku mori pjesë edhe Rektori i UEJL-së, Prof. Dr. Sadudin Ibraimi, së bashku me përfaqësues të menaxhmentit dhe stafit akademik të universitetit.

Në takimin me Prorektorin për Planifikim, Hulumtime dhe Ndërmarrësi, Prof. Dr. Veland Ramadani, u diskutuan mundësitë për zhvillimin e programeve të përbashkëta studimore (Joint Degrees dhe Double Degrees) në kuadër të paketës së punës WP3 të aleancës ChallengeEU. Bashkëbiseduesit shqyrtuan mundësitë për krijimin e një diplome të përbashkët në fushën e ndërmarrësisë dhe inovacionit, si një hap i rëndësishëm drejt zgjerimit të ofertës akademike ndërkombëtare.

Një takim i veçantë u zhvillua me përgjegjësin e Zyrës së Marrëdhënieve Ndërkombëtare, Bujar Sinani, ku u prezantuan mundësitë e mobilitetit për studentët dhe stafin akademik, si dhe shërbimet dhe programet që UEJL ofron në kuadër të bashkëpunimit ndërkombëtar.

Në ditën e dytë të vizitës, delegacioni i MIUN dhe përfaqësuesit e UEJL-së zhvilluan takime të ndara në Ambasadën e Suedisë në Shkup me ambasadorin e Suedisë në Maqedoninë e Veriut, Ola Sohlström, si dhe me një nga partnerët themelues të Dhomës Ekonomike Suedezo-Maqedonase. Gjatë këtyre takimeve u theksua rëndësia e bashkëpunimit të suksesshëm ndërmjet MIUN dhe UEJL-së në kuadër të Aleancës Evropiane të Universiteteve ChallengeEU, si dhe ambicia e përbashkët për zhvillimin e programeve inovative studimore në fushën e ndërmarrësisë dhe inovacionit.

Bashkëpunimi ndërmjet dy universiteteve përfaqëson një shembull të shkëlqyer të lidhjeve akademike dhe institucionale, duke krijuar mundësi të reja për studentët, stafin akademik dhe komunitetin e biznesit.