Login

Anëtarët e stafit duhet të përdorin llogarinë e tyre Webmail për identifikim.

Universiteti i Evropës Juglindore
jetëso dijen tënde!

UEJL-ja feston Nëntorin përmes dijes, gjuhës dhe historisë

Në vitin e jubileut të 25-vjetorit, Universiteti i Evropës Juglindore i bashkon festat e nëntorit me gara enigmatike, shpërblime dhe mirënjohje, të hapura për të gjithë.

Sivjet, nëntori ka një domethënie edhe më të veçantë: UEJL-ja shënon 25 vjet të veprimtarisë së saj. Ky jubile bashkon krenarinë për rrugëtimin e Universitetit me përgjegjësinë për të vazhduar misionin e tij në shërbim të dijes dhe shoqërisë.

Në këtë frymë, festimi ndërthur tri ngjarje: 25-vjetorin e UEJL-së, Ditën e Alfabetit dhe Ditën e Flamurit.

Dita e Alfabetit na kujton rëndësinë e shkronjave që na bashkojnë dhe të gjuhës përmes së cilës mësojmë, krijojmë dhe përcjellim kulturën tonë. Dita e Flamurit na lidh me historinë, përpjekjet për liri e pavarësi dhe respektin për trashëgiminë kombëtare. Jubileu i Universitetit e pasuron këtë muaj me një tjetër arsye për të festuar: një çerek shekulli kushtuar arsimit dhe formimit të brezave.

Kujdesi i UEJL-së për këto vlera shprehet përmes veprimtarive që nxisin pjesëmarrjen, mendimin dhe dëshirën për të mësuar. Për një institucion arsimor, festa merr kuptim të veçantë kur shndërrohet në një përvojë njohjeje dhe krijimtarie.

Nga 23 deri më 30 nëntor 2026, ky festim do të zhvillohet përmes tri garave enigmatike, të mbështetura në botimet e posaçme të revistës Rebusi, kushtuar këtyre tri ngjarjeve. Gjëzat do t’i ftojnë pjesëmarrësit të vënë në provë njohuritë gjuhësore e historike, logjikën, vëmendjen dhe aftësinë për të gjetur lidhje e zgjidhje.

Kështu, gjuha bëhet sfidë krijuese, historia bëhet njohuri që zbulohet dhe kujtimi bëhet pjesëmarrje aktive. Garat sjellin kënaqësinë e zgjidhjes, vlerësimin e përpjekjes dhe mundësinë për t’u shpërblyer.

Pjesëmarrja është falas dhe e hapur për të gjithë. Ftohen studentët, nxënësit, punonjësit dhe të gjithë dashamirët e gjuhës, historisë dhe enigmatikës.

Për mbarëvajtjen e garave do të kujdeset komisioni organizativ, ndërsa vlerësimi i rezultateve do të bëhet nga juria vlerësuese.

Shpallja e rezultateve do të bëhet më 5 dhjetor 2026, në kampusin e UEJL-së, ku do të ndahen edhe shpërblimet dhe mirënjohjet.

Festojmë duke mësuar. Nderojmë duke kujtuar. Bashkohemi përmes dijes.

Google+