Vizita e delegacionit të Western Carolina University (SHBA) në UEJL

Përfaqësuesit e universitetit amerikan përbëheshin nga Dr. Kim Winter, Dekane e Kolegjit të Edukimit dhe Profesioneve Ndihmëse, Dr. A.J. Grube, Dekane e Kolegjit të Biznesit, Dr. Dan Grube, Profesor i Edukimit dhe Këshilltar për Ndërkombëtarizim, si dhe Prof. Wesley Milner, PhD, Drejtor i Angazhimit Global dhe Profesor i Studimeve Ndërkombëtare.

Gjatë takimit bilateral u diskutuan gjerësisht mundësitë për bashkëpunim institucional në fushat e mobilitetit të studentëve dhe stafit akademik, zhvillimit të projekteve të përbashkëta kërkimore, krijimit të programeve të përbashkëta studimore, si dhe forcimit të procesit të ndërkombëtarizimit të arsimit të lartë. Delegacioni i WCU-së shprehu një interes të veçantë për bashkëpunim konkret në fushat e edukimit, biznesit, shkencave sociale dhe juridike, si dhe në iniciativa të ndryshme që mbështesin inovacionin dhe zhvillimin e kërkimit shkencor.

Në kuadër të kësaj vizite, delegacioni u njoh nga afër me hapësirat e kampusit të UEJL-së dhe infrastrukturën moderne akademike. Po ashtu, mysafirët realizuan një vizitë të veçantë në Institutin “Max van der Stoel”, ku u prezantuan aktivitetet kërkimore dhe projektet e suksesshme që ky institut zhvillon në fushën e të drejtave të njeriut, qeverisjes demokratike dhe politikave publike.