Në UEJL u promovua projekti ndërkufitar “Green Schools Initiative”

Projekti do të zbatohet gjatë 18 muajve të ardhshëm nga UEJL si partner udhëheqës, në bashkëpunim me Komunën e Bërvenicës, Institutin për Politika Zhvillimore (INDEP) dhe Education Empowerment Initiative (EEI) nga Kosova. Gjatë aktivitetit, pjesëmarrësit u njohën me objektivat dhe planin e veprimit të projektit, ndërsa u nënshkruan edhe marrëveshjet e partneritetit dhe dokumentet e strukturës drejtuese të projektit.

Në fjalën e tij përshëndetëse, Rektori i UEJL-së, Prof. Dr. Sadudin Ibraimi, theksoi rëndësinë e bashkëpunimit rajonal dhe të investimeve në efikasitetin energjetik dhe edukimin mjedisor, si elemente kyçe për zhvillim të qëndrueshëm.

Përmes këtij projekti do të mbështeten shkollat me zgjidhje moderne për ngrohje efikase dhe masa për kursimin e energjisë, duke kontribuar në uljen e emetimeve të karbonit, rritjen e vetëdijes mjedisore dhe promovimin e tranzicionit të gjelbër në komunitetet lokale.

Projekti “Green Schools Initiative” paraqet një hap të rëndësishëm drejt krijimit të institucioneve arsimore më të qëndrueshme dhe forcimit të bashkëpunimit ndërkufitar në funksion të objektivave evropiane për klimën dhe zhvillimin e qëndrueshëm.