Министерот за надворешни работи на Бугарија, Никола Младенов: ЈИЕУ ја симболизира претставата за тоа како треба да изгледа Балканот во иднина

Министерот Младенов, претходно имаше кратка средба со ректорот на ЈИЕУ, академик Алјдин Абази,  на која  дискутираа за  взаемната соработка. Ректорот Абази, рече дека целта на овој универзитет е регионалната соработка и во оваа насока постојат многу области во кои имаме заеднички интерес. Министерот Младенов во своето предавање зборуваше за перспективите на земјите на Балканот кон евроатланските интеграции.
„Ова е моја втора посета во Тетово. Прв пат дојдов тука во ’94 -’95 година, време исполнето  со разни тензии. Можам да забележам  дека тука во многу работи има значително подобрување“, рече Младенов.
Пред одржувањето на предавањето во главниот хол на Факултетот за бизнис администрација министерот Младенов свечено ја отвори изложбата со фотографии на фотографот Александар Михаилов со наслов „Традиции“ на која беа прикажани колоритните обичаи на бугарската култура. На фотографиите се овековечени моменти од церемониите одржани на ридските подрачја покрај брегот на Црното Море изведени од државјани на Бугарија од различно етничко и религиозно потекло: христијани, муслимани, Турци и Роми.